د اترا رئیس: له مخابراتي خدمتونو څخه د ولس د شکایتونو اورېدنې مرکز باید په یوه اوونۍ کې واضح تغییرات رامنځته کړي د مخابراتي خدمتونو د تنظیم ادارې ( اترا) نن دوشنبه د شکایتونو د اورېدنې په برخه کې د کمي او کیفي ظرفیت لوړونې غونډه وکړه

غونډه چې د اترا ادارې سرپرست رئیس محترم عمر منصور انصاري په مشرۍ جوړه شوې وه په کې د اترا ادارې د رهبرۍ تر څنګ، د اترا د بورډ، رهبرۍ شورا او د اترا ادارې د مختلفو برخو رئیسانو ګډون کړی و.

په غونډه کې د شکایتونو د اورېدنې مرکز کاري راپور واورېدل شو او ترڅنګ یې د دغه امریت په تخنیکي، مالي، کاري ستونزو هم بحث وشو.

د اترا سرپرست رئیس عمر منصور انصاري هدایت ورکړ چې په یوه اوونۍ کې باید د شکایتونو د اورېدنې ټلیفوني مرکز اوسني ظرفیت او کاري نوښتونو کې د پام وړ پرمختګونه رامنځته او ورسره سم د دغه مرکز د سیسټم نوي کولو، د تشکیل پراختیا او کاري ظرفیت په زیاتولو، د کال سنټر لپاره د نوې ټکنالوژۍ په اخیستلو کار پیل شي.

اترا ادارې په ۱۳۹۰ کال کې د شکایتونو د اورېدنې مرکز یا کال سنټر فعال کړ چې تر دې دمه یې د ۹۹۹، ۹۹۸ وړیا شمېرو تر څنګ له انلاین پورټلونو، عرایضو او نورو ممکنه لارو څخه د هېوادوالو زرګونه شکایتونه ترلاسه کړي او له مخابراتي شرکتونو سره یې د حل لپاره تعقیب کړي دي.